Pirat
Als Grënnungsmember, fréiere Vize-Präsident an aktuelle Koordinator vum Bezierk Zentrum schaffen ech drun, fir Lëtzebuerg méi modern, fair an transparent ze gestalten.
Meng politesch Prioritéiten sinn d'Chancë vum digitale Wandel ze notzen, méi Transparenz & Participatioun, eng gerecht Steierpolitik an abordable Logement.
Am Oktober 2009 hunn ech Piratepartei gegrënnt, well ech wollt um politeschen Dialog zu Lëtzebuerg Deel huelen, mech awer a kenger Partei rëmfonnt hunn. D'Organisatioun an aner Parteie war mer ze strikt, den digitale Wandel gouf net opgegraff, eng oppen an transparent Demokratie war keng Prioritéit. Dofir hunn ech mech entscheet mat de Piraten eng eege Beweegung ze grënnen, déi dës Themen opgräift.
Ech war éischte Vizepresident vun der Partei an 2010-2011 och Co-Virsëtzende vum Daachverband vun den internationale Piraten, den Pirate Parties International. 2013 an 2018 sinn ech mat an d'Chamberwale gaangen, wou ech als Zweetgewielten am Zentrum hannert dem Sven Clement eng Plaz an der Chamber knapp verpasst hunn. Ech well am Oktober 2023 rëm fir d'Piraten am Zentrum kandidéieren an ons Iddien an der Chamber vertrieden.
Meng politesch Prioritéiten
Digital Chancë notzen
Den digitale Wandel biergt vill Chancë, mee och Risiken. Artifiziell Intelligenz, Blockchain, Machine Learning - et gëllt d'Chancë vum Digitalen ze notzen ouni blann all neiem Trend hannendrun ze lafen. Ech sëtze mech a fir datt de Staat den digitale Wandel esou encadréiert, datt mir vun de Beneficer kënne profitéieren an ouni datt d'Risiken ignoréiert oder simplifiéiert ginn.
Méi Transparenz & Participatioun
Transparenz ass d'Grondbedéngung vun enger participativer Demokratie. En oppenen Debat ka just stattfanne wann Prozesser, Dokumenter, Zuelen an Interessie fir jiddereen anzegesi sinn. Ech sëtze mech dofir an datt ons demokratesch Prozesser méi transparent ginn an onnéideg opaque Prozeduren oppe geluecht ginn.
Eng gerecht Steierpolitik
Onsen aktuelle Steiersystem ass ongerecht, benodeelegt systematesch verschidde Kategorie vu Persounen an Aarbecht gëtt generell méi taxéiert wéi aner Source vu Revenue. Ech sëtze mech a fir e méi gerechte Steiersystem, mat transparente Reegele bei deenen déi, déi vill hunn deenen déi manner hunn ënnert d'Aërm gräifen.
Abordabele Logement
D'Logementskris gouf jorelaang verschlof, well eng Regierung no där aner gemengt huet et géif d'WielerInne net betreffen - an elo ass se mat den aktuelle Krisen nach méi akut ginn. Mir brauchen elo eng fair Logementspolitik, wou d’Locatairen, Primo-Acquéreuren a kleng Proprietären an de Mëttelpunkt gestallt ginn.
Weider Themen
Weider Themen, déi mer a menger politescher Aktivitéit wichteg sinn.